炒股炒市成功必要的心態 (三) ── 避免對風險有錯誤認知

係好耐好耐以前,新鴻基地產(0016)公佈業績前幾天......

羊生:「堅持,你點睇0016呀?」
堅持炒市:「應該幾好丫,你想炒業績?」
羊生:「係呀!我睇短期應該會升,不過已經升左好多,我怕出左業績之後會趁好消息出貨,所以我打算116蚊買一手正股,再買一張115蚊嘅即月認沽期權,限制一旦我睇錯邊嘅損失。」
羊太:「嘩!老公你真係一個謹慎嘅投資者,做左呢個認沽期權對沖,咁我地睇錯邊,業績後大裂口低開都不怕止不了蝕,整個組合最多都係輸一蚊加期權金,但係睇啱就呵呵呵......」
羊生:「哼!梗係啦!正所謂要投資,先求知,我當然懂得善用期權控制風險!絕對唔會一鋪清袋。堅持你會點部署?」
堅持炒市:「我會買入一張即月115蚊嘅認購期權。」
羊生:「嘩!堅持我真係睇錯咗你!你知唔知期權長倉易輸難贏,正所謂期權做長倉,輸到眼光光。淨係時間值都輸死你啦,正股一跌又毫無防守力,肯定變廢紙!你真係當你一定睇啱?只顧追求高回報,不理風險,係輸家必備本質!好心你學下我,認識清楚期權嘅真正玩法啦!」
堅持炒市:「不懂得期權嘅真正玩法的好像是你......」
「請問你的穩陣做法,最多會輸幾多錢?」堅持問。
「頭先我老婆咪講左,正股一蚊加期權金2.4,大約三千四百啦!」
「咁我呢?我最多會輸幾多錢?」
「你會輸哂全部期權金3.4......唔...都...都...都係三千四百...」
「贏又如何?」堅持續問。
「贏就當月尾升到125蚊,咁我就贏125-116-2.4=6.8,你就贏10-3.4...都...都...都係6.8......一樣都係六千八百蚊。呀...點會咁架...」
「哈哈,你而家知道你的所謂穩陣做法,根本同我所謂高風險做法係一模一樣的吧!」
「......」
「我既做法,只需要付出本金3400蚊;你既做法則要本金118400蚊,還涉及正股買賣,一入一出要一共付股份價值0.2%的印花税,高下立見。」
「呀......唔同既......我始终有正股係手,今個月唔升仲可以等下個月....」
堅持打斷說:「即係點? 咁下個月又買多張put? 你想短炒變長揸,輸到叫阿媽? 你目的明明係短炒業績......唔服輸才是散戶輸大錢既頭號殺手......」
「......」

買正股同時買put, 會被人視為比較保守的投資:單邊買call, 會被人視為極進取的賭博, 但實際上兩者的風險及回報是一樣的, 這就是對風險的錯誤認知。錯誤認知會衍生出很多投資決策上的誤判, 嚴重影響投資回報:感覺上比較「穩當」的投資,會因為投入了過大的注碼,在逆境中導致比想像之中大的損失;感覺上「風險較大」的投資,卻會因為注碼太少而享受不了應有的回報(說到這裡,又忍不住想起匯豐(0005)和宏利(0945)這兩隻非常「穩陣」的股王......更不用說那些迷你債劵,高息ELN了)。

那麼如何避免錯誤認知風險呢? 當然是要投資,先求知啦! 就好像上述的故事,羊生的基本期權知識不是錯,只是了解得不夠透徹。這個年頭我們短炒實在太多工具可以出擊,大家在決定用甚麼工具之前,不妨比較各個方法在最壞情況時的損失及在預想情況下的回報,找出令自己覺得最舒服的平衡,這樣才有可能在長期的抗戰中成功。